Министерството за здравство информира дека министерот за здравство Илир Демири, согласно препораките на Комисијата за заразни болести донел одлука со која се дозволува прием и престој во детските градинки на деца кои по Catch-up календар ја комплетирале примовакцинацијата (три дози ДиТеПер вакцина), со задолжително примање на првата ревакцина шест месеци по примањето на последната (трета) доза од примовакциналната серија.
Одлуката денеска стапува на сила, а од понеделник ќе се применува.
Од таму информираат и дека ДиТеПер вакцините за возрасни се стигнати и граѓаните можат да се вакцинираат во вакциналните пунктови.
-Вакцините се безбедни и претставуваат најголемо достигнување на здравствениот систем. Апелираме до сите граѓани, особено до родителите на децата во предучилишна возраст да ги вакцинираат своите деца затоа што главен приоритет е нивната здравствена заштита.
Вакциналните пунктови за имунизација работат во две смени со цел да им биде полесно на родителите да ги имуницираат своите деца, велат од таму.