Под мотото „Стоп за сообраќајното насилство“ во сабота во Неготино ќе се одржи протест за 22-годишната Фросина Кулакова.
Протестот, како што информираат организаторите ќе се одржи во 14 часот на улицата „Маршал Тито“, кај семафорите.
– Време е да ја подигнеме свеста за трагедиите што секојдневно се случуваат на нашите улици. Маршираме за да испратиме силна порака, доста е со жртви на улиците.
Овој протест е за Фросина, за Викторија, за сите жртви на сообраќајното насилство и за сите чии животи се изгубени поради немарни возачи и неефикасни институции. Секој од нас е изложен на опасности во сообраќајот. Никој не е заштитен од трагедија. Не смееме да дозволиме оваа серија загуби да продолжи, стои во повикот за протестот.
Барањата на протестниот марш се безбедни улици за сите, почитување на пешачките премини, ограничувањата на брзината и правата на сите учесници во сообраќајот.
Се бара и поголема свест за опасностите, строга контрола за возење под дејство на алкохол и наркотични супстанци, како и најстроги казни за сообраќајните насилници, без толеранција за оние што возат без дозвола, без соодветна обука или намерно ги загрозуваат животите на другите.
Се бара и одговорност од институциите, крај на заташкувањето на сообраќајните злосторства и правна правда за жртвите.
– Фросина заслужува правда. Викторија заслужува правда. Сите жртви на сообраќајното насилство заслужуваат правда, велат организаторите на настанот.
Другарките на Кулакова организираат и бесплатен автобус од Скопје до Неготино и назад, за сите што сакаат да присуствуваат на протестниот марш.
ПОВРЗАНИ ВЕСТИ
Со Фросина Кулакова било прегазено и нејзиното куче Аја, ја чекало под автомобилот на Васил
„Нашите планови ги срушија за миг“: Емотивна објава на момчето на Фросина Кулакова