Од Министерството за внатрешни работи (МВР) денеска информираа дека Агенцијата за цивилно воздухопловство (АЦВ) забрани вршење било какви операции со воздухоплови без екипаж – дронови, на територијата на неколку општини, населени места и локации.
Од МВР велат дека неовластено и некоординирано оперирање со овие воздухоплови не само што го загрозува воздушниот сообраќај, туку може да предизвика сериозни последици по животот и имотот на трети лица на земја.
Посочуваат дека летањето дронови во забранети зони е основ за поведување постапка за санкционирање согласно Законот за воздухопловство.
Забраната важи за следните локации: Кочани, вклучувајќи ги селото Оризари, селото Тркање и селото Зрновци, Штип со околните места, Општина Чешиново – Облешево, вклучувајќи ги селата Соколарци и Чифлик, Струмица со околните места, Пробиштип со околните места, Македонска Каменица со околните места, Виница, вклучувајќи го селото Митец, Скопје – гробиштата Бутел, гробиштата во Ѓорче Петров, гробиштата во селото Горно Лисиче и гробиштата во Горно Нерези.
„Апелираме до граѓаните во овие денови на неизмерна тага и болка во рамки на загарантираното со Устав право на собирање и одржување на протест, истите да се одржат во мирна атмосфера, да се почитуваат веќе донесените одлуки од страна на државните институции и да се почитуваат наредбите и насоките од страна на полициските службеници, во насока на обезбедување на мирот, безбедноста и сигурноста на сите граѓани во државата“, велат од МВР.
ПОВРЗАНИ ВЕСТИ
За снимање со дрон во Скопје и Кочани приведени осум лица од Македонија, Србија и Бугарија
Агенцијата за цивилно воздухопловство забрани употреба на дронови над Кочани и Штип