Од денеска почнува Велигденскиот пост, во пресрет на најголемиот христијански празник Христовото воскересение, кој годинава се празнува на 5. мај.
Она што е најважно за постот, освен воздржувањето од одреден тип на храна, е пред се духовната подготовка.
На секој верник, духовникот му одредува правило во однос на постењето со храна, согласно неговата телесна и здравствена (не)моќ. Но она што е суштината, е човек да се преиспита, да ги осознае сопствените гревови, да се покае, да се сврти малку повеќе кон духовното, наспроти материјалното.
„Неопходно е да се подготвиме и да се вооружиме со христијанските добродетели: воздржание, молитва, милосрдие и љубов. Овие добродетели треба да бидат стожерот на нашиот од во постот. Без нив, тој би бил само една обична диета, без никаква длабока духовна вредност. Во нашиот современ живот видлив е култот кон телото на човекот и немајќи со што друго да се пофали, модерниот човек сѐ повеќе се изразува себеси преку телесната голотија и физичките атрибути, а сѐ поретко преку добродетелите на душата.
Оваа опсесија со физичкиот изглед и со многуте диети што се следат како модни трендови, во никој случај не смее да се поистовети со светиот пост, ниту да нѐ одвлече од вистинската суштина на блаженото воздржание, која е всушност преобразбата и облагородувањето на душата и срцето. Да, точно е и тоа дека постот е здрав и за телото, но неговата примарна вредност е дека ни е даден како средство за духовно и душевно лекување, препорачано од Самиот наш Спасител,“ вели Епископ Партениј, Игумен Бигорски.
ПОВРЗАНИ ВЕСТИ