Сите земји членки на Европската Унија (ЕУ) на вонредниот Самит во Брисел, освен Унгарија, како и што се очекуваше, ја повторија својата подршка за Украина, и ја истакнаа потребата, руската агресија да заврши со сеопфатен, праведен и траен мир.
ПОВРЗАНИ ВЕСТИ
Самит на ЕУ во Брисел: Европа ќе се вооружува
Во предлог-заклучоците меѓудругото стои и дека мирот во Украина треба да биде заснован на принципите на Повелбата на Обединетите Нации и меѓународното право.
„Европскиот совет ја потврдува својата континуирана и непоколеблива поддршка за независноста, суверенитетот и територијалниот интегритет на Украина во нејзините меѓународно признати граници“, се вели во текстот.
Заклучоците ги повторуваат и претходните позиции на ЕУ дека за Украина не може да се разговара без неа, дека не може да има дискусија за европската безбедност без да се вклучи Европа и дека трансатлантската, глобалната безбедност, како и безбедноста на Украина и Европа, се меѓусебно поврзани.
Исто така, дека секое примирје или прекин на огнот е прифатливо само ако е дел од процес кој води кон сеопфатен мировен договор, дека секој таков договор мора да биде придружен со силни и веродостојни безбедносни гаранции за Украина, кои ќе придонесат за одвраќање на идната руска агресија.
Во предлог-заклучоците е нагласена и посветеноста на ЕУ за продолжување на зголемената политичка, финансиска, економска, хуманитарна, воена и дипломатска поддршка за Украина и нејзиниот народ и за зголемување на притисокот врз Русија, вклучително и дополнителни санкции и зајакнување на имплементацијата на постоечките мерки, со цел да ја ослабне нејзината способност да ја продолжи својата агресивна војна.
Европскиот совет ја изразува подготвеноста на земјите-членки да придонесат за безбедносните гаранции за Украина во согласност со нивните можности.
„Безбедносните гаранции треба да се преземат заедно со Украина, како и со истомислениците и партнерите во НАТО“, се вели меѓудругото во заклучоците.
Фото: Унсплеш