Комисијата за заразни болести не е надлежна да кажува кога треба да се одржат изборите, туку само да изработи здравствен протокол во однос на нивната имплементација, истакна денеска министерот за здравство, Венко Филипче.
Тој на прес-конференција рече дека претседателот на државата, Стево Пендаровски побарал од Комисијата да го изработи здравствениот протокол, која веќе го има завршено. Лидерите на партиите, како што рече, се тие кои треба да одлучат за датумот на нивното спроведување.
Тој додаде дека во протоколот се ставени повеќе работи во однос на спроведување на изборниот процес, но смета оти епидемијата сега е повеќе под контрола, а ризикот може да биде зголемен во период што следи.
„Сега сметаме дека епидемијата е повеќе под контрола, наспроти тоа што може да е зголемен ризик во периодот кој што следи. Сега позитивни се ефектите од карантините, затворените училишта и градинки, но и граници.
Сето ова е дополнителен ризик да се појават нови случаи кога ќе се отворат границите, и ќе се пуштат во функција училиштата и градинките, таму покасно во есента и сезонскиот грип, така што мандатот на комисијата е да ги каже здравствените аспекти, а во однос на тајмингот ќе одлучат лидерите на партиите,“ рече Филипче.
ПОВРЗАНИ ВЕСТИ
Филипче: Очекуваме втор бран на корона вирусот наесен, ќе инвестираме да го дочекаме подготвени