Владата на една од последните седници донела одлука за доделување концесија за експлоатација на минерална суровина – термоминерална вода на локалитетот „Стрновец“, Општина Старо Нагоричане на друштвото за градежништво, производство, трговија и услуги „Голден арт“ ДОО увоз-извоз Скопје.
Според одлуката објавена во Службен весник, „Голден арт“ ДОО увоз-извоз Скопје ги исполнила условите содржани во јавниот повик и тендерската документација и доставила најповолна понуда.
„Времетраењето на доделената концесија од точка 1 на оваа одлука изнесува 30 години. Надоместокот за доделената концесија за експлоатација во износ од 8.500.000 денари (138.000 евра) субјектот е должен да го плати во рок од 30 дена од денот на влегувањето во сила на оваа одлука.
Најповолниот понудувач е должен да го потпише Договорот за концесија во рок не подолг од 60 дена од денот на влегувањето во сила на оваа одлука. Надзор над спроведувањето на концесијата ќе врши Министерството за економија.
Во име на Владата договорот за концесија ќе го потпише министерот за економија“, пишува во владината одлука.