Крафт пиварницата Бакревски, на браќата Марјан и Горан Бакревски од Битола, е една од ретките крафт пиварници во Македонија, па и во регионот, која произведува 100 отсто природно пиво.
Тие засега ги произведуваат јачменово IPA пиво, темно STOUT пиво и пченично, а пивото „Бак“, секогаш е свежо, природно, без додатоци на бои и ароми и нефилтрирано.
Марјан е професор, талентиран музичар со диплома од Музичкиот колеџ во Бостон, а Горан е стоматолог.
„Свирам во рок бенд, и секој од членовите, нешто произведуваше. Некој вино, некој ракија, си реков зошто јас не пиво. И така пред шест години започна се,“ изјави Бакревски за „еМагазин“, на дегустацијата на ова пиво.
Засега пивото не е во продажба, бидејќи чекаат издавање на дозвола за да можат легално да работат.
Капацитетот на семејната пиварница е пет тона, или 10.000 шишиња месечно. Освен овие три вида на пиво, браќата Бакревски работат и на создавање на две нови безалкохолни пива. Размислуваат и за точено пиво, кое од друга страна би им ги скратило трошоците за амбалажа.
Вкусовите на пивата постојано ги унапредуваат, а веќе се добро прифатени од страна на битолчани, кои им ги бендисуваат производите.
Откако ќе ја земат потребната дозвола за работа, бизнисот од Битола, ќе започне да се шири.
Фото: Инстаграм/пиварница Бакревски