Општина Чаир средствата предвидени за новогодишно украсување ќе ги додели на семејствата на жртвите во автобуската несреќа

Советот на Општина Чаир денеска на вонредна седница одлучи да им се додели парична помош на семејствата чии роднини ги загубија животите во трагичната несреќа што се случи вчера во Бугарија.

Како што информираат од Општината, едногласна била одлуката средствата предвидени за украсување на територијата на Чаир за новогодишните празници да бидат распределени на семејствата на загинатите во трагичната несреќа во Бугарија.

– Советот едногласно ја одобри одлуката. Тоа значи дека од сметката 425990, програма Е0 одбиваме 1.200.000 денари и истите ги додаваме на сметката 412110 програма А0 – постојани резерви, изјави градоначалникот на Чаир, Висар Ганиу.

Советот на општината формираше и комисија со претставници од сите партии во Советот на Општина Чаир и еден вработен од општинската администрација, кои ќе одлучуваат за распределбата на овие средства.

– Нека им е лесна земјата на оние што ги загубија животите, а нивните роднини, пријатели, колеги нека живеат и нека се сеќаваат на нив, изјави градоначалникот Ганиу.

ПОВРЗАНИ ВЕСТИ

16 од загинатите во несреќата во Бугарија се од Чаир, градоначалникот Ганиу смета дека бројката е поголема

Повредените во сообраќајната несреќа во Бугарија, во петок треба да се вратат дома, двајца од нив се оперирани

(ВИДЕО) Осум се деца: 12 лица од исто семејство загинаа во несреќата во Бугарија

Фото: МИА