„Следејќи ги дебатите, обраќањата и изјавите во медиумите на некои професори, политичари, аналитичари, стручњаци и други, не можев да се воздржам, а јавно да не проговорам и го изнесам мојот став како поранеше вршител на повеќе државно-јавни функции, по повод престојниот референдум.
Почитувани граѓани, немам дилема и гордо ќе излезам и ќе го дадам мојот глас ЗА“, пишува во соопштението до медиумите, Бранко Наумоски, прв народен правобранител и поранешен претседател на Уставниот суд на РМ.
„И јас како и повеќето граѓани не сум најсреќен со некои од одредбите на договорот со Грција, но имајќи ги предвид нашите маки и проблеми, економски, безбедносни и политички и други турбуленции, во изминатиов период од осамостојувањето до денес, најодговорно тврдам дека ова е единствено најоптимално и најрационално решение за иднината на нашата држава, а тоа се евро-атланските интеграции.
Во оваа прилика сакам да ги повикам сите оние манипулатори, дезинфоматори, квазиполитичари и квазипатриоти и разно разни стручњаци и квазианалитичари, кои од лукративни и клиентелистички побуди станаа политичари, аналитичари и стручњаци, да престанат да ги манипулираат и дезинформираат граѓаните со повик за бојкот, под превезот дека договорот е штетен и манипулантски. И еднаш барем, наместо за свои и туѓи интереси, нека направат нешто за нашата држава.
Почитувани граѓани, ова за мене е историски момент за државата, ајде да ги оставиме партиските книшки и чувства и сите да се сплотиме, да излеземе масовно и да гласаме ЗА, да гласаме за Европска Македонија и како генерација да обезбедиме услови за безбедна иднина на нашите идни генерации.
Убеден сум и сигурен дека, договорот обезбедува она за што сите тежнееме и го посакувавме веќе четврт век. Ние со векови сме биле, сме и ќе бидеме македонци. Ние сме зборувале, зборуваме и ќе зборуваме македонски јазик. Среќно“, стои во соопштението.
Фото: Уставен суд