Универзалниот снабдувач на електрична енергија, ЕВН Хоме, на тендерот за набавка на електрична енергија за задоволување на потребите на корисниците за периодот јули-декември 2024 година за 85% од потребите добила само една понуда од компанијата АД ЕСМ со купопродажна цена на електрична енергија од 60 евра за мегаватчас, а за останатите 15%, три понуди, од компаниите Дуферцо МК, ЕСМ Продажба и Соле24, со понудени цени кои биле за околу два и пол пати повисоки, во однос на понудената цена на ЕСМ, информираат од таму.
„Управниот одбор на ЕВН Хоме донесе одлука да ја прифати понудата од АД ЕСМ за 85% од потребите, додека за останатите потреби од 15%, понудите на компаниите не беа прифатени од страна на ЕВН Хоме поради значително повисоките цени во однос на пазарните во моментот.
Како резултат на тендерската постапка спроведена неодамна, од 1. јули 2024 година ЕВН продолжува да врши снабдување со електрична енергија на домаќинствата и малите потрошувачи.
Договорот со Владата за обезбедување на универзална услуга е потпишан на 18.06.2024 година, по што следува процес на лиценцирање во Регулаторната комисија за енергетика.
Овој процес кој е неопходен за обезбедување на континуитет во снабдувањето со електрична енергија преставува голем предизвик, поради краткиот рок до престанувањето на важноста на постојната лиценца, како и отворените прашања во однос на начинот на кој ќе се пристапи кон продолжувањето на лиценцата за периодот од следните 5 години,“ велат од компанијата.
Под комплетен надзор на Регулаторната комисија за енергетика и согласно законските обврски и претходно утврдената методологија, во наредниот период ЕВН Хоме ќе ја пресмета цената на електрична енергија по однапред утврдени влезни параметри.
„Како и секогаш, во крајната цена влегуваат: цената по која АД ЕСМ ја продава електричната енергија на ЕВН Хоме, цената на Преносниот систем оператор МЕПСО, цената на Операторот на пазар на електрична енергија МЕМО, како и цената на Дистрибутивниот систем оператор Електродистрибуција,“ се додава во соопштението.
Фото: Unsplash