Судењето за изборни нерегуларности „Титаник“ е одложено за 4 септември, на барање на обвинителката од Специјалното јавно обвинителство (СЈО), Лиле Стефанова.
Одолжувањето беше побарано откако одбраната на обвинетите предложи прекинување на постапката за „Титаник“ до разрешување на состојбата со специјалната јавна обвинителка Катица Јанева, која според нив е единствено надлежна да ги застапува предметите на СЈО.
Обвинителката Стефанова, во однос на предлогот на одбраната, рече дека како СЈО сметаат дека овластувањата на Јанева се уште се важечки иако е неспорен фактот дека таа е во притвор за случајот „Рекет“.
– Го замислувам судот да ја одложи денешната расправа и на следната закажана ќе се произнесеме по наведените барања, изјави Стефанова.
Пред почетокот на рочиштето, адвокатот Димитар Дангов побара прекин на главната расправа поради, како што рече, одредениот притвор на Јанева за предметот „Рекет“.
– Според Законот за СЈО, Катица Јанева преку својството кое го има е единствено надлежна да го застапува секој, па и овој предмет. Од наведените причини мора да кажам дека обвинителката Лиле Стефанова нема право да го застапува овој предмет. Конечно Стефанова не може да има повеќе право на застапување од правото што Јанева го нема во овој момент. Предлагам главната расправа да се прекине, изјави Дангов.
Обвинетиот Илија Димовски, пак, на судот му посочи дека согласно случувањата, може да се смета дека постапката за разгледување на работата на СЈО е започната.
– Предлагам судот да донесе решение до завршување на постапката на Советот на јавни обвинители и Собранието, и доколку одлуките бидат негативни по Катица Јанева, судот да ја прекине расправата, изјави Димовски.
Предлагам, посочи Димовски, овој предмет во интерес на сите во постапката да ја почека разврската.
Процесот го води судијата Осман Шабани, а застапник на обвинението е Лиле Стефанова од СЈО.
Случајот се наоѓа во доказна постапка и досега се изведени околу 4.700 од вкупно 5.900 материјални докази предложени од СЈО.
Освен поранешниот премиер Никола Груевски кој е во бегство, во „Титаник“ обвинети се и Кирил Божиновски, Миле Јанакиески, Гордана Јанкулоска, Билјана Бришкоска Бошковски, Илија Димовски, Мунир Пепиќ, Едмонд Темелко, Леко Ристоски, Кирил Тодоровски, Катерина Веловска, Станко Коруновски, Коста Марковски, Драгче Драгчески, Марјан Накевски, Гоце Јаневски, Џезми Ахмет, Роберт Давитков, Далибор Алешковиќ и Ленка Рашјаковска.
Тие се осомничени за злосторничко здружување, повреда на избирачкото право, повреда на слободата на определување на избирачите, поткуп при избори и гласање, уништување изборен материјал и злоупотреба на средства за финансирање изборна кампања.
МИА
ПОВРЗАНИ ВЕСТИ
Судот и ја отфрли жалбата на Јанева за определениот притвор
За синот на Катица Јанева нема доволно докази дека е вмешан во „Рекет“
Стеван Павлески ќе ја застапува само Јанева, се откажа од Панделевски