Германскиот Бундестаг утре и официјално ќе даде зелено светло за почеток на преговори со Македонија и Албанија, а на седницата на покана на претседателскиот на германскиот Парламент, Волфганф Шојбле, ќе присустува и вицепремиерот задолжен за европски прашања, Бујар Османи.
Владејачките германски партии ЦДУ и СПД вчера постигнаа согласност да се одобри датум за почеток на преговори со Европската унија за Македонија и Албанија, а се очекува поддршката да ја даде уште најмалку една партија, Зелените, јави Дојче Веле. Одлуката била донесена вчера на состанок на коалициските партнери во германската Влада.
ЦДУ, на канцеларката Ангела Меркел и социјалдемократите нагласила дека почетокот на преговорите со двете земји ќе испрати важен сигнал за целиот регион.
Пратеничката на СПД, Незахат Барадари, која е и член на парламентарната комисија за ЕУ ја потврди информацијата и најавува дека конечното зелено светло ќе биде дадено на седницата на Бундестагот в четврток.
-Тоа што коалициските партии го ослободија патот за почеток на пристапните преговори со Северна Македонија и Албанија е важен сигнал за европската интеграција на целиот регион, вели Барадари.
За отпочнување на претпристапните преговори со ЕУ конечната одлука ќе ја донесе Советот на Унијата на самитот закажан за 15 и 16 октомври.
МИА/Фото: Влада