Незадоволни членови од Синдикатот за образование наука и култура (СОНК) попладнево пред седиштето на синдикатот побараа претседателот на СОНК, Јаким Неделков да се обрати и да објасни зошто штрајкот е ставен во мирување.
– Денеска се ретерира без знаење на членството и се носи одлука за која членството не е информирано. Тука сме да изразиме револт. Ние сме базата, ние сме членството и должен е Неделков да дојде и да објасни зошто ја промени одлуката, порачаа насобраните членови на СОНК, кои бараат оставка од Неделков.
Посочуваат дека се дојдени спонтано и дека се чувствуваат изиграни од претседателот на синдикатот. Велат дека не им се важни процентите за зголемување на платите, туку колективните договори.
– Голем дел од членството ќе продолжи да ги бара своите права. Нас не ни се битни тие 18 отсто. Прва работа поради која тргнавме во штрајк е колективниот договор, кажаа тие.
Прашани дали ќе има утре настава, велат дека оние деца што ќе дојдат во училиште, нема да бидат вратени.
– Сите оние кои утре ќе дојдат во училиште, ќе бидат прифатени. Ние ќе бидеме во училиште, ако дојдат деца, ќе ги примиме. Ако треба ќе држиме и настава, порачаа дел од наставниците кои попладнево се собраа пред седиштето на СОНК.
Синдикатот на СОНК денеска го стави штрајкот во мирување по добиеното известување од Министерството за труд и социјална политика дека Министерството за образование и наука е подготвено преку мирно решавање на спорот да ги надмине разлките со СОНК.
ПОВРЗАНИ ВЕСТИ
Штрајкот ставен во мирување, учениците од утре на училиште
МИА/Фото: МИА