Денеска почнуваат божиќните пости кои траат до 7. јануари, Божиќ, кога се празнува раѓањето на Исус Христос.
Но што претставува постот, повеќе од Св. Тихон Задонски. Вистински пост е и телесен и духовен.
„Постои пост телесен, постои и пост душевен. Телесен е пост кога стомакот пости од храна и пијалоци; а душевен е постот кога душата се воздржува од лоши помисли, зборови и дела…
Полезен ни е телесниот пост, зошто ни служи за умртвување на страстите, но душевниот пост толку ни е потребен, што телесниот пост без него е безвреден.
Многумина постат со телото, но не постат со душата; многумина постат од храна и пиење, но не постат од лоши помисли, зборови и дела, и каква им е ползата од тоа? Вистинскиот пост е воздржување од секое зло! Значи, ако сакаш, Христијанину, постот да ти биде полезен, а ти, постејќи телесно, пости и душевно, и пости секогаш.
Како што му налагаш пост на својот стомак, наложи им и на лошите помисли и на своите желби. Нека пости твојот ум од суетни помисли, нека пости твојата волја од лоши желби; нека постат твоите очи од лошо гледање; нека постат твоите уши од срамни песни и клеветнички шепотења; нека пости твојот јазик од клеветење, осудување, хулење, лажење, мамење, од изговарање на срамни и празни зборови; нека постат твоите раце од тепање и грабање туѓи богатства; да постат твоите нозе од одење кон лошо дело. Клони се од зло и прави добро.
Тоа е христијанскиот пост каков што бара Бог од нас.“
Извор:pokajanie.mk/Фото:Европска епархија