Државата ни е преубава и почесто треба да се истражува. Не е доволно да се посетат само комерцијалните места, потребен е мал авантуристички дух, па човек да посака да допре до недопрена природа.
Природата е најдобар лек за сите стресови, притисоци кои ги носи секојдневниот урбан живот. Одиш на планина, се прочистуваш и повторно си подготвен да ги трпиш сите урбани глупости.
Не е само Шар Планина, вредна за посети. Има и други пониски врвови кои се соодветни за рекреативци и вљубеници во природата кои се подготвени да издржат малку поголем физички напор, од едно вообичаено шетање низ град.Таков е врвот кратовски Лисец на надморска височина 1.527 метри.
Се трга од село Псача, а пејзажите кои следуваат потоа, се нереални. Прекрасна висока шума пресечена со рекичка, дрвја кои се издигнуваат кон облаците, дрвја со различни облици како во филм со најубави слики.
Пешачењето е два ипол часа до три, во зависност од кондицијата на групата, а за погледот од врвот нема пари кои можат да го купат. На дланка ви се Крива Паланка, Кратово, Шарпланинскиот масив, Истокот.
На врвот има и црквичка Св.Злата Мегленска која е отворена за посетителите. Има и место за уживање, но најважно е, целиот смет што ќе го направите да си го соберете.
Попат ќе ги сретнете и мирољубивите жители чиј што главен извор на приходи се земјоделство и одгледување на стока.
Патеката е маркирана, но најдобро е да се приклучите на планинарско друштво или некој што веќе ја одел и ја знае. Уживањето е загарантирано.
