Германската влада од следниот петок ги укинува строгите ограничувања за влез на патници од трети земји надвор од ЕУ, а отворањето ќе важи и за државјаните на Македонија, пренесува Дојче Веле.
Германското министерство за внатрешни работи информираше дека од петок 25 јуни во Германија ќе бидат дозволени посети и туристички патувања за вакцинирани лица од земји надвор од ЕУ.
Олеснувањето на мерките најпрво ќе важи само за целосно вакцинирани лица со вакцините одобрени од Европската агенција за лекови (ЕМА) а тоа се „Фајзер“, „Модерна“, „АстраЗенека“ и „Џонсон и Џонсон“.
Руската вакцина „Спутник V“ и двете кинески „Синофарм“ и „Синовак“ засега немаат зелено светло од европската агенција.
„Проширувањето на листата со други вакцини со слични стандарди за заштита ќе биде можна кога ќе бидат извршени потребните тестови“, соопшти германското МВР.
Како целосно вакцинирани лица се сметаат оние кај кои минале 14 дена од примањето на втората доза на вакцината. За да се спречат измами со вакциналните сертификати, нивната точност ќе ја проверуваат авионските компании и полицијата.
Исклучок од зелената листа ќе бидат патници од територии со вирусни варијанти. Тоа, според Институтот Роберт Кох, се држави како Индија, Велика Британија или Бразил, каде се појавија нови варијанти на коронавирусот.
Фото: Photo by Claudio Schwarz | @purzlbaum on Unsplash