Израелската амбасада донираше 48 специјални колички за деца, по повод Меѓународниот ден на лицата со попречености.
Пет од овие колички ќе бидат распределени на Универзитетската клиника за детски болести, дел ќе одат на Детска хирургија, во Клиничките болници Битола, Прилеп и Штип, во Завод за рехабилитација-Скопје, но и во други здравствени установи низ земјава.
„На мое големо задоволство денес една од овие колички ќе биде донирана на едно детенце со dg.Paralysis cerebralis, Epilepsija. Детето е дел од едно големо семејство од 12 членови, од селото Брест-скопско“, изјави министерот Венко Филипче и додаде дека оваа донација оди на вистинското место и во вистинско време.
„Задоволство ми е што дониравме специјални колички за децата. Веруваме дека ќе им го олесниме секојдневнието“, рече амбасадорот на Израел, Дан Ориан.
Оваа донација е многу важна, бидејќи количките ја олеснуваат мобилноста и движењето на децата пациенти во болнички услови.
„Благодарна сум на оваа донација, навистина многу ни значи, поради тоа што ќе помогнеме на дечиња кои не се во можност да одат сами. Но, ќе биде олеснување и за нивните родители. Кочичките се лесни, што го олеснува управувањето со нив. Искрено се надевам дека нашата соработка ќе продолжи и понатаму. Израелската амбасада е наш пријател и пријател на дечињата во болницата“, потенцираше директорката на Универзитетската клиника за детски болести, Катерина Ставриќ.