Вакцината на кинескиот производител „Синофарм“ со која ќе започне имунизацијата против Ковид 19 во нашата земја е класичен модел на вакцина, соопшти министерот за здравство д-р Венко Филипче, кој ги објасни главните карактеристики на вакцината.
„Вакцината е добиена на технологија на ослабнување (инактивирање) на целиот вирус, постапка која се користи со децении за добивање на класични вирусни вакцини.
Овој тип вакцини има оптимален однос помеѓу безбедноста и ефикасноста, токму поради тоа може да се дава на сите граѓани, без ограничување по било кој основ.
Се чуваат на стандарден режим од 2 до 8 степени и тоа од аспект на логистика и дистрибуција, значително ја олеснува нивната примена.
Дополнително, вакцините ги добиваме во формулација на претходно наполнет шприц, што ја олеснува и самата апликација на вакцината“, изјави министерот.
Оваа вакцина повеќе од 2 месеци веќе се дава во други земји: Кина, Обединети Арапски Емирати, Јужна Америка…, досега се дадени повеќе милиони дози, со потврдена ефикасност над 90% и безбедност во смисла на многу мал процент на несакани реакции.
„За секој граѓанин кој ќе ја прими првата доза, веднаш ќе биде резервирана и втората што треба да ја прими по 21 ден, што значи дека од првата пратка имаме две дози за вакцина и ревакцина за 100.000 лица. Заштита од оваа доза се обезбедува со две дози вакцина“, објасни Филипче.
Конкретно за оваа вакцина на „Синофарм“, термините за вакцинација во ЈЗУ-а ќе бидат на 10 минути, по пациент. ЈЗУ-ата ќе работат во две смени со цел да се постигне што повисока стапка на вакцинација на дневно ниво.
„Со набавката на вакцината на „Синофарм“ обезбедена е доволна количина за вакцинацина во следните 6 до 7 недели од моментот на започнување на вакцинацијата.
Според најавите од Ковакс механизмот и производителот „Фајзер“, очекуваме во тој период пристигање и на дел од тие обезбедени вакцини, за што здравствениот систем е подготвен за прием, дистрибуција и вакцинација“, вели Филипче.
Министерот Филипче, упати апел до граѓаните во ризичните групи да се вакцинираат во што поголем број како би ги заштитиле од ризик.
„Да не заборавиме целта на вакцинацијата е намалување на смртноста кај ризичните групи.Би сакал да потенцирам дека сите вакцини кои се на пазарот се развиени на безбедни платформи, односно се безбедни за граѓаните“, изјави Филипче.
Имунизацијата е силно оружје во борба против ковид пандемијата, но и понатаму задолжително треба да се почитуваат другите јавно здравствени мерки од страна на сите граѓани- носење на заштитна маска, одржување на физичка дистанца и хигиена, порача министерот.
ПОВРЗАНИ ВЕСТИ
Филипче: Би се вакцинирал со која било вакцина што прва ќе пристигне