Во штипското комунално претпријатие „Исар“ петмина вработени се позитивни на коронавирусот, а седум нивни колеги се во изолација, соопштија денеска директорот на ЈП „Исар“, Живко Тасев и градоначалникот на Општина Штип, Сашко Николов.
Засега поради ширењето на вирусот нема проблеми во работењето на најголемото претпријатие во источниот регион. Мерките за ротација на вработените, кои работат во канцеларии се применува подолг временски период.
Николов вели дека Општинскиот кризен штаб ќе достави и апел до сите транспортни фирми и стопански субјекти во Штип да се почитуваат протоколите при превоз на работниците во автобусите, со цел да не се случи минатогодишното ширење на вирусот, кое почна во неколку конфекции, но се рашири при превозот на текстилните работнички и во други конфекции.
Општинските инспектори и сообраќајната полиција ќе бидат на терен, иако според Николов превозниците ги почитувале мерките. Побара поголема одговорност од граѓаните, да не се групираат, но и да ги почитуваат сите здравствени мерки.
МИА/Фото: МЗ