Секое дете со попреченост има потреба од индивидуална континуирана стручна поддршка, со цел максимален развој на неговите потенцијали. Во период на зголемени мерки за заштита од вирусот Ковид-19 и ограниченото движење, најголемиот дел од сервисните служби беа принудени да ги прекинат услугите или да ги трансформираат своите услуги и преку алтернативни начини, техники и методи, да ги понудат на нивните корисници.
Во таа насока и Здружението за асистивна технологија „Отворете ги прозорците„ со цел да овозможи континуитет во својата работа со децата со попреченост, во партнерство со УНИЦЕФ и Министерството за труд и социјална политика ја креираше платформата Онлајн сервисна служба, којашто нуди високо-квалитетна и индивидуализирана едукација за деца со попреченост.
Преку платформата се испорачуваат четири вида услуги за деца со попреченост: индивидуализирана поддршка за користење компјутер и интернет, рана стимулација на развојот, логопедски услуги и советодавно-консултативна поддршка за родители/старатели.
Услугите се базираат на пристапот во чиј фокус е самиот корисник (person-centered approach) и се во насока на подобрување на личниот развој на децата.
„Нашите специјални едукатори и логопеди, за секое дете кое ги исполнува критериумите за поддршка, дизајнираат индивидуализирани планови за онлајн часови по кои понатаму заедно во соработка со родителите/старателите на детето работат на подобрување на некои животни вештини кај детето, му помагаат при учењето, го подобруваат говорот кај детето и слично.
За да овозможиме квалитетна поддршка тимот одвојува време да ги идентификува потребите на секое дете посебно. Во периодот кој претстои ќе се стремиме да осигураме дека сите наши досегашни и нови корисници ќе ја добијат потребната грижа и поддршка,“ изјави Кренар Ќоку од Здружението за асистивна технологија „Отворете ги прозорците“.
Регистрацијата може да се изврши преку пополнување на барање на платформата на следниот линк otw.assistive.mk/baranjeMK или преку јавување на телефонските броеви во продолжение: 072275211за македонски јазик и 071989822 за албански јазик.
За да се информирате подетално за бесплатната платформа „Онлајн сервисна служба„, ве молиме кликнете на линкот во продолжение: otw.assistive.mk.
ПРОМОТИВНА ОБЈАВА