Почна судскиот процес по тужбата на обвинителката Вилма Русковска против ВМРО-ДПМНЕ за спотовите во изборната кампања во кои партијата го користеше ликот на обвинителката.
Според тужбата, тоа предизвикало загриженост, анксиозност и душевна болка кај шефицата на Јавното обвинителство за организиран криминал, бидејќи без докази се тврдело дека таа работи незаконски.
Според одбраната на ВМРО-ДПМНЕ спотовите во кои се користел ликот на Русковска не биле клевета, туку критика.
„Првата работа поради која што цениме дека тужбеното барање во целост е неосновано, е заштитата на членот 10 од Европската конвенција за човекови права, слободи и права, односно потребата од почитување на правото за слободно изразување на мислата. Особено на критичката мисла која што е насочена кон работењето на државните органи и на власта во Република Македонија.
Се поставува прашање што е побитно? Дали јавниот интерес, дали потребата граѓаните да бидат информирани, потребата на граѓаните на Република Македонија да можат да постават одредени прашања во саркастични и провокативна форма?
И воедно заштитата на членот 10, или заштитата на приватната репутација на еден јавен функционер која што патем е платена од пари на граѓаните на Република Македонија, извршувајќи ја функцијата како што ја извршува обвинителката за организиран криминал“, изјави адвокатот на партијата Панче Тошковски.
Инаку, Русковска бара ВМРО-ДПМНЕ да ѝ исплати отштета од 10.000 евра и најави дека парите ќе ги донира во хуманитарни цели.
МИА/Фото: МИА