Движењето за поддршка на креативноста Иво Лауренчиќ – „Браво Сине!“ во соработка со издавачката куќа „Арс Ламина“ го објави конкурсот за новосоздадени бајки за проектот „Современи бајки од Македонија“.
На конкурсот кој е објавен денеска и ќе трае до 17 август 2020 година, можат да конкурираат сите автори кои сакаат својата креативност да ја изразат преку пишаниот збор наменет за најмладите.
Според условите на конкурсот, авторите треба да испратат текст во должина од најмногу 6500 карактери или 1200 зборови што одговараат на 3,5 страници во „Ворд“ (MS Word). Авторите треба да имаат предвид дека победничките бајки ќе се илустрираат, така што текстот треба да биде соодветен за натамошна креативна илустрација.
Заинтересираните автори можат да конкурираат со своја автентична бајка или, пак, со креативна адаптација и прераскажување на бајки од фолклорната традиција. Пристигнатите бајки на овој конкурс, не смеат да бидат претходно објавувани.
Сите заинтересирани автори треба да ги испратат своите бајки на адресата [email protected], најдоцна до 17 август 2020 година, а конкурсот ќе може да се најде на www.bravosine.mk ; www.arslamina.com и www.literatura.mk. Поединечната награда за откуп на авторските права на една бајка ќе изнесува 25.000 денари.
По завршување на конкурсот сите пристигнати текстови ќе бидат оценети, а до крајот на септември 2020 година ќе бидат објавени избраните бајки.
Новиот конкурс е дел од проектот „Современи бајки од Македонија“, што го реализираат Движењето за поддршка на креативноста Иво Лауренчиќ – „Браво Сине!“ и издавачката куќа „Арс Ламина“. Целта на овој проект е креирање на можности за авторите кои сакаат да пишуваат литература за деца и млади.
Организаторите на конкурсот ги охрабруваат сите заинтересирани лица да земат учество на овој конкурс преку своите креативни текстови.
„Современи бајки од Македонија“ следи по големиот успех на претходните изданија „Бајки од Македонија“ и „Басни од Македонија“. Тоа беше поттик за новата иницијатива за проектот „Современи бајки од Македонија“ за да се даде можност на новите креативни автори, но и да се придонесе кон креирање на навики за читање кај најмладите, преку содржини кои ќе поттикнат љубопитност кај нив. Во рамките на оваа соработка е издадена и бајката за деца „Мистериозното јајце“ на авторот Оливер Коларевски.
Движењето за поддршка на креативноста Иво Лауренчиќ – „Браво сине!“, чија цел е поттикнување и поддршка на талентот и креативноста кај младите во функција на создавање силни национални брендови, го носи името на еден од основоположниците на современата македонска креативна и маркетинг индустрија – Иво Лауренчиќ, кој во текот на целиот свој работен век им даваше огромна поддршка на младите и ги поттикнуваше да го изразат својот креативен потенцијал.
ПРОМОТИВНА ОБЈАВА