Во период кога се уште се кршат копјата по прашањето каде ќе се најдат пари за рефрендумот и кој ќе ја спроведува кампањата интересно е да се види кои државни институции трошат најмногу пари од буџетот и со какво темпо ги реализираат планираните реасходи.
Министерството за финансии неодамна објави осврт на расходите и одливите од Буџетот на РМ за најголемите буџетски корисници, чиј вкупен годишен буџет претставува 84,5% од вкупниот буџет на сите буџетски корисници.
Во периодот јануари – јуни 2018 година, преку разделот Министерство за финансии – функции на држава реализирани се 27,2 милијарди денари. Износот остварен во овој период е 2,4 пати повисок од реализацијата во истиот период претходната година како резултат на повисоката отплата на главнина во овој период од 2018 година (21.960 милиони денари или 80,7% од вкупните расходи на буџетскиот корисник), откако во јануари беше извршена отплата на рата од претходен долг и делумен предвремен откуп на постоечка еврообврзница, а истовремено беше зголемена отплатата на главнина кон домашни институции.
По основ на каматни плаќања отпаѓаат 8,1% од вкупните расходи, за што се реализирани 2,2 милијарди денари. Трета најзначајна ставка со учество од 4,1% се тековните трансфери до ЕЛС, за што се потрошени 1,1 милијарда денари.
Министерството за труд и социјална политика во првата половина на 2018 година реализираше 21,6 милијарди денари или 4,3% повеќе во споредба со претходната година.
Реализацијата на расходите изнесува 49,6% од вкупниот буџет за 2018 година. Притоа, најголем дел (73,3%) од расходите во овој период се наменети за тековни трансфери до вонбуџетските фондови, за што се потрошени 15,8 милијарди денари или 50,1% од средствата наменети за 2018 година.
Втора најзначајна расходна ставка се социјалните бенефиции, кои учествуваат со 18,8% во вкупните расходи. За оваа намена реализирани се 50,4% (4 милијарди денари) од планираните за 2018 година.
Министерството за образование и наука во периодот јануари – јуни 2018 година реализираше буџетски средства во износ од 10,6 милијарди денари (42,5% од планираното), што е за 4,4% помалку во споредба со претходната година.
Најголем дел од расходите (63,8%) претставуваат тековни трансфери до ЕЛС, за што се потрошени 6,8 милијарди денари или 49,4% од вкупно планираните средства. Плати и надоместоци се втора најзначајна ставка со учество од 15,5%, за што се потрошени 1,6 милијарди денари, односно 47,4% од вкупно предвидените.
За стоки и услуги (кои учествуваат со 11,8% во вкупните расходи) реализирани се 1,2 милијарди денари, што претставува 30,6% од вкупно предвидените средства за тековната година.
За капитални расходи (кои учествуваат со 1,6% во вкупните расходи) реализирани се 169 милиони денари, што претставува 7,9% од вкупно предвидените средства за тековната година.
Во првата половина од 2018 година Агенцијата за финансиска поддршка во земјоделството и руралниот развој (АФПЗРР) реализираше средства во износ од 6,5 милијарди денари (раст од 39,2% во однос на 2017 година), односно стапката на реализација изнесува 75,7% од вкупните планирани средства за 2018 година.
Во периодот јануари – јуни 2018 година од страна на Министерството за внатрешни работи вкупно се реализирани 5,1 милијарди денари, што претставува 50,0% од буџетот за 2018 година, односно раст од 6,2% во однос на претходната година.
Најзначајна расходна ставка претставуваат плати и надоместоци со учество од 70,3%, за што се потрошени 3.600 милиони денари или 49,3% од планираното. Втора најзначајна ставка се стоки и услуги со учество од 15,9%, за што се реализирани 817 милиони денари или 47,6% од годишниот план.
Министерство за здравство во првата половина од годината реализираше буџетски средства во износ од 3јарди мили денари (зголемување од 5,5% во споредба со истиот период од претходната година), што е 46,1% од вкупниот буџет за 2018 година.
Тековните трансфери до вонбуџетските фондови имаат најголемо учество во расходите со 59,9%, за што во периодот јануари – јуни 2018 година потрошени се 1,8 милијарди денари или 65,8% од средствата наменети за 2018 година. Стоките и услугите се втора најзначајна ставка со учество од 29,8% во вкупните расходи, а во анализираниот период за оваа намена потрошени се 914 милиони денари, односно 46,3% од вкупно предвидените.
Реализацијата на капиталните расходи (кои учествуваат со 8,6% во вкупните расходи) изнесува 14,9% односно извршени се 264 милиони денари.
Министерство за одбрана во првата половина од 2018 година реализираше буџетски средства во износ од 2,5 милијарди денари, што е 39,4% од вкупниот буџет за 2018 година, и претставува пад од 1,6% во однос на претходната година.
Платите и надоместоците имаат најголемо учество во расходите со 72,1%, за што во периодот јануари – јуни 2018 година реализирани се 1,8 милијарди денари, што претставува 48,9% од вкупно предвидените средства за тековната година.
Стоките и услугите учествуваат со 23,2% во вкупните расходи, за што во анализираниот период потрошени се 595 милиони денари, односно 34,2% од вкупно предвидените. За Финансирање на дејностите од областа на културата во периодот јануари – јуни 2018 година извршени се средства во износ од 1,4 милијарди денари, што е 39,9% од вкупниот буџет за 2018 година. Износот потрошен за оваа намена е за 33,2% понизок во споредба со истиот период претходната година.
Намалувањето на расходите на овој буџетски корисник е делумно резултат на намалувањето на буџетот за капитални расходи во културата со цел подобрување на структурата и економската оправданост на вкупните капитални расходи. Плати и надоместоци имаат највисоко учество во вкупните расходи со 34,0%, а нивната реализација во првата половина на годината изнесува 48,4%, односно извршени се 509 милиони денари.
Субвенциите и трансферите учествуваат со 31,8%, а за оваа намена реализирани се 475 милиони денари или 38,7% од планираното. За капитални расходи реализирани се 300 милиони денари што претставува 30,7% од вкупно предвидените средства за тековната година, а оваа ставка претставува 20,1% од вкупните расходи.
Министерство за транспорт и врски во првата половина на 2018 година реализираше средства во износ од 1 милијарда денари, што претставува 17,6% од вкупниот буџет за 2018 година. Во однос на истиот период од претходната година, расходите се пониски за 53,6%. Реализацијата на капитални расходи во првата половина од 2018 година изнесува 645 милиони денари, што е 12,3% од годишниот буџет за оваа намена, но се очекува интензивирање на реализацијата на капиталните расходи во втората половина на годината.