Со презентација на нови сведоци денеска во Кривичен суд Скопје е предвидено да продолжи судскиот процес за случајот „Таргет -Тврдина”.
Изминатиот период со исклучок на 3. ноември рочиштата за овој предмет беа одложени заради здравствената состојба на обвинетиот Сашо Мијалков, кој беше позитивен на Ковид-19.
На последното рочиште за главниот предмет за незаконоското прислушување беа изведени материјални докази од страна на Обвинителството.
Процесот го води судијката Џенета Бегтовиќ, а застапници на обвинението се Ленче Ристеска, Трајче Пеливанов и Артан Ајро.
Според обвинителниот акт, преку три системи за следење на комуникациите во Управата за безбедност и контраразузнавање (УБК), во периодот од 2008 до 2015 година незаконски биле следени 4.286 телефонски броеви за кои воопшто не биле издадени судски наредби.
Комуникацијата била следена пред да бидат издадени и по завршување на траењето на важноста на судските наредби на 1.541 број или вкупно 5.827 телефонски броеви.
Прислушувани биле над 20 илјади граѓани.
МИА