„Спутник 5“ е името на новата вакцина против корона вирусот која ја одобрија руските власти, што веднаш предизвика лавина реакции и сомнежи по прашањето дали ги минала сите потребни тестови за да се користи за масовно вакцинирање.
Името го добила по првиот сателит што Советскиот сојуз го лансира во орбитата со што беше означен почетокот на трката за освојување на Вселената.
Асоцијацијата на името е повеќе од јасна ако се земе предвид дека сега во трка за развивање вакцина против корона вирусот се лаборатории од САД, Европа, Кина…
Но светските медиуми, укажуваат дека рускиот Институт „Џемелаја“ допрва треба да ја спроведе третата фаза на тестирање на вакцината врз десетици илјади волонтери во високо контролирани услови, процес кој единствено може да гарантира дека таа е безбедна за употреба.
Во моментов, во светот во различна фаза на испитување се 30 вакцини.
Според научниците, вакцина со сите потребни испитувања би можела да се појави на пазарот најрано на крајот на оваа година.
Сега западните медиуми коментираат дека на рускиот претседател Владимир Путин му требала победа на политички план и затоа толку рано објавил дека Русија е победник во трката за вакцина против корона вирусот.
Сепак, руските власти најавија дека вакцината во септември ќе се дистрибуира меѓу здравствените работници, а дека во јануари би почнало масовно вакцинирање што до некаде се поклопува со роковите поставени од науката.
Според првичните информации, 20 земји веќе нарачале милијарда вакцини „Спутник 5“
ПОВРЗАНИ ВЕСТИ
Путин: Русија ја има првата вакцина против корона вирусот, вакцинирана е и мојата ќерка
Фото:Фејсбук/Путин