Општинскиот Оперативен штаб информираше дека во последното деноноќие во Дебар не се регистрирани новозаразени со Ковид-19, што потврдува дека состојбата се стабилизира.
Ова е единаесетти ден по ред како нема новозаразени, по двата случаи кои беа потврдени на 9 април, откако немаше новозаразени 12 дена.
„Според лабораториските резултати за денес, во Дебар нема нови случаи со Ковид-19, со што бројката на заразени останува 51, од нив две лица од Центар Жупа.
Од вкупната бројка 45 се оздравени, двајца се уште се на домашно лекување, а за жал четворица починаа“, изјави градоначалникот на Дебар Хекуран Дука, кој раководи и со штабот.
Сепак, тој препорачува и понатаму, како и досега, граѓаните да бидат доследни во почитувањето на мерките и препораките зашто „битката е добиена, но војната со невидливиот непријател продолжува“.
Како што потврди директорот на Општата болница во Дебар, Баки Халили, од двајцата пациенти кои се на домашно лекување еден е здравствен работник. Кај нив утре ќе се направи ретестирање и доколку резултатот биде негативен тие ќе се сметаат за оздравени.
Во исто време во Дебар и Центар Жупа, во тек е скринингот за имунитетот на населението, што го спроведуваат 14 матични лекари, меѓу нив и педијатри и гинеколози, кои треба да направат 2.342 теста.
Дел од матичните лекари тестирањето го почнаа во четвртокот, а по денешниот ден за одмор продолжуваат утре.
МИА/Фото: Општина Дебар
ПОВРЗАНИ ВЕСТИ
Скопјанец на 73 години и жена од Липково на 49 години починаа од корона вирусот
Убава вест: Оздравени 126 лица кои боледуваа од корона вирусот, најголем број од Куманово
Нови 19 случаи позитивни на корона вирусот, вкупната бројка заразени 1.386 лица
Најчест висока температура: 479 лица од заболените со коронавирусот во Македонија без симптоми