По одличниот прием на првиот сингл Inseparable, македонската музичка атракција Brass Brothers на пошироката публика и го претстави вториот сингл од албумот Balkan Mayhem со име Winner.
Winner е нумера која ја носи карактеристичната енергија на Brass Brothers и ќе не потсети на старото “нормално време“ и живите настапи на бендот. Енергична, весела, со динамична ритмика, вокални хармонии, спој на ska, jungle, dnb и reggae стилови, оплеменета со специфичниот егзотичен глас на Z Dimention, Winner ќе ве натера да посакате да заиграте.
ПОВРЗАНИ ВЕСТИ
(ВИДЕО) “Inseparable” – Најава за првиот авторски албум на Brass Brothers
Соработката со еден од најдобрите Reggae и Dance Hall изведувачи од Кингстон, Јамајка, Z Dimention (Dwain Williams) на Winner и дава посебна егзотика и ќе овозможи нивната моќна порака: дека љубовта и позитивната енергија прават сите да сме победници, да биде слушната и споделена и на големите светски сцени.
Музиката на Winner е на фронтменот на Brass Brothers, Горан Мицевски Кус, додека аранжманот на песната е заедничко дело на Ненад Тодоровски – Todd Haze, Ристе Шандаров и Горан Мицевски Кус.
Winner е достапна за слободно преслушување на сите дигитални платформи и може да се купи на сите дигитални музички продавници.
Brass Brothers со Inseparable и Winner, слој по слој ни ја откриваат приказната зад нивниот прв авторски албум Balkan Mayhem, кој ќе донесе нов и необичен звук на македонската музичка сцена, а и пошироко. Тие се првиот музички бенд кој DnB звукот го збогатуваат и комбинираат со Brass секција.
Balkan Mayhem е енергичен, моќен, оригинален и креативен албум, полн со живот. Како и самиот бенд и албумот е со уникатен звук и апсолутно позитивна енергија и порака.
Brass Brothers е формиран пред 8 години и во него членуваат Горан Мицевски Кус (тромбон), Костадин Бетоски (саксофон), Пере Мелов (труба), Николче Михајловски (Dj) и Ник де Карло (туба).
Brass Brothers функционираат како кавер бенд препознатлив по динамичните живи настапи и зад себе ги имаат авторските нумери “Време Невреме“ на македонски јазик и “Inseparable“ на англиски јазик.
Фото/видео: Промо