Лидерот на ВМРО-ДПМНЕ, Христијан Мицкоски денеска најави дека Пратеничката група на неговата партија „колку што е можно“ ќе ги блокира предложените измени на Законот за данок на добивка во Собранието.
– Не е добар воопшто, ние тоа го коментиравме. Ние сме само опозиција и не можеме во моментот, освен коментар, што било друго да направиме. Апсолутно застануваме позади барањата на коморите дека ова не треба да биде имплементирано. Можам да ветам, ако тие сепак одлучат тоа да го направат, со сите сили во Парламентот тоа да го блокираме, онолку колку што можеме, одговори Мицкоски, прашан за предлог измените за Законот за данокот на добивка и реакциите коморите.
Мицкоски, кој денеска заедно со градоначалникот на Општина Бутел, Дарко Костовски, присуствуваше на пуштањето во употреба на новиот спортско рекреативен центар „Македонија“ во Радишани, во изјавата додаде и дека „идната влада на ВМРО-ДПМНЕ“ ќе го врати решението во законот „онака како што беше“.
Во реакција на Предлогот на закон за измени и дополнувања на Законот за данок на добивка, Сојузот на стопански комори на Македонија, оцени дека со него наместо да создаде услови за правично оданочување, се предизвикува сериозен удар врз малите и микро фирми, се загрозува нивниот опстанок и се стимулира даночна евазија.
Oд Занаетчиската комора, пак оценија дека со измените државата наместо да се бори со сивата економија и да обезбеди услови за формалните дејности, иницира тие да преминат „во непопуларната и никому од корист сива економија“.
Измените на Законот за данокот на добивка, заедно се веќе усвоените измени на Законот за данокот на личен доход и предложените измените и дополнувањата на Законот за ДДВ, се дел од Концептот на даночна реформа.
МИА