Вработените во спортските обложувалници се сериозно загрижени за последиците по нивната егзистенција доколку се усвојат новите предлог-измени на Законот за игри на среќа.
„Донесувањето на ова законско решение ќе значи затворање на сите објекти и оставање преку ноќ без егзистенција 3.500 вработени во обложувалниците, а околу 10.000 вработени во целата индустрија.
Покрај тоа, евентуалното донесување на овој закон ќе има последици и по останатите субјекти, мали семејни компании со кои соработуваме, а чија заработувачка исклучиво зависи од нашето работење.
Ова е огромна штета која може да им се нанесе на голем број семејства кои ќе останат без своите основни приходи,“ истакнаа тие на денешната прес-конференција.
Од таму велат дека, иако како причина за донесување на новиот предлог-закон се наведува заштита на малолетниците, тие додаваат дека и сега целосно го почитуваат моменталниот закон кој го регулира ова, а во кој е строго пропишана забрана за пристап и учество на малолетниците во игрите на среќа.
„Ако во наш објект влезе лице за кое се сомневаме дека е малолетно, ние како вработени сме должни да побараме документ за идентификација и доколку лицето не поседува таков документ, го замолуваме да го напушти објектот. Ние немаме интерес и не сакаме малолетници во нашите објекти. Работиме чесно и според сите закони.
Во услови на ваква кревка економија и економска нестабилност, се прашуваме дали државата е свесна што ќе се случи доколку се затворат сите објекти од индустријата? Приредувачите на игри на среќа се најголемите даночни обврзници и полначи на државната каса, преку кои државата секоја година добива милиони евра во буџетот,“ велат тие.
Вработените во обложувалниците објаснуваат дека успеале да ја пребродат и најтешката година на пандемијата.
„Никој од нас не беше отпуштен, дополнително имавме и вработувања на луѓе кои останале без работа со кризата, тие беа примени во нашите фирми. Иако нашиот сектор беше меѓу првите кој беше затворен, сепак работодавците обезбедија редовни плати и придонеси за сите вработени, не дозволувајќи да останеме на улица.