Македонската претседателка Гордана Сиљановска Давкова го разреши директорот на Агенцијата за разузнавање, Еролд Муслиу.
Нова директорка на Агенцијата е Габриела Јаковлева, која како што информираа од Кабинетот на претседателката работела во Агенцијата.
Разрешена е и заменик-директорката во Агенцијата, Александра Бакреска Додовска, а на нејзино место е именувана Ивана Стојановска, која исто така работела во Агенцијата.
Муслиу, кој на оваа позиција е втор мандат, смета дека одлуката на Сиљановска Давкова е попуштање пред партиските притисоци.
Тој вели дека нема да навлегува во политичката логика и автономија при носењето на ваквата одлука од страна на претседателката, но, како што пишува во неговата реакција, во случајот со неговото разрешување отсуствуваат законската оправданост и мерит-системот, за кој, како што вели, Сиљановска Давкова постојано зборувала во јавноста.
„Посебно сум разочаран од постапката и начинот кој го избра при моето разрешување, не покажувајќи доблест да се сретнеме на прва информативна средба на која би добила брифинг за природата на работата на Агенцијата и за безбедносното опкружување и актуелната состојба во регионот“, стои меѓудругото во писмената реакција на Муслиу.
Согласно Законот за Агенцијата за разузнавање, со Агенцијата раководи директор кој го именува и разрешува претседателот на државата. Тој се именува за време од четири години со право на реизбор за уште еден мандат.
ПОВРЗАНИ ВЕСТИ
Фото: 360 степени