Прилепчанецот Антонио Пандовски со трчање и пешачење планира во јули да стигне до Манастирот Острог во Црна Гора, за да им помогне на децата со рак.
Како што соопшти на неговиот Фејсбук-профил, тоа му е животна желба и тоа го прави и во чест на неговите починати родители.
Тој бара помош од некоја фондација да се вклучи во неговиот проект, а како што вели во интервју за radiopela.mk не за него, туку истата да помогне во собирањето на парични средства за децата кои боледуваат од рак.
-Мојот мотив е да им помогнам на децата што боледуваат од рак. Сакам да соберам што е можно повеќе средства и да им помогнам во нивното лекување.
Втор мотив е да им оддадам почит на моите родители. Мојот татко се викаше Васил, а манастирот го носи името „Св. Василије Острошки“. Мајка ми пак, имаше голема желба да го посети овој манастир, но за жал не успеа. Откако веќе таа не е меѓу нас, кај мене се створи желба да отидам до Острог, но на ваков начин, со хумана цел, вели тој во интервјуто и меѓудругото посочува дека овој подвиг планира да трае 12 дена.
-Благодарение на една жена која не е од Македонија, овозможени ми се неопходните услови, како сместување за време на мојот подвиг. Таа госпоѓа ми даде ветар в грб за да го реалзирам мојот сон, вели тој во интервјуто.
Фото: Фејсбук/Пандовски