Бебето кое имаше модрици на рацете по престојот на Детската клиника, имало наод за тромбоцитопенија – состојба на намалени тромбоцити од која се појавуваат модринки, објави Слободен печат.
Оваа состојба, била потврдена од тројца специјалисти од Клиниката, меѓу кои и директорот, доктор Реџеп Мемеди.
Доктор Мемеди вели дека модриците се на раката во делот каде што една од медицинските сестри го држела бебето, додека другата го боцкала, а дека тромбоцитопенијата која била претходно констатирана во наодот немала улога, затоа што крвната слика била повторно направена и немало веќе намалени тромбоцити.
Двајцата други доктори пак, не се согласуваат и ни рекоа дека кога постои тромбоцитопенија, можно е да се случи да се појават модрици и има поголема осетливост, а бебето во конкретниот случај било склоно и кон крвавења.
Што точно се случувало, денеска треба да биде утврдено од страна на Комисијата, но информацијата потврдена со медицински наод за тромбоцитопенијата кај бебето, му дава сосема нов тек на целиот настан – дека тој има медицинско оправдување, а не меѓуетничка заднина, пишува Слободен печат.
Семејството претходно тврдеше дека модринките кај детето биле како резултат на конфликт со медицинската сестра, која наводно го повредила, бидејќи семејството не знаело да зборува македонски.
ПОВРЗАНИ ВЕСТИ