Министерството за здравство информираше дека еден пациент од повредените од пожарот во Кочани, кој беше хоспитализиран во медицински центар во Австрија, денеска се враќа во Македонија, по што согласно протоколите ќе биде задржан под 24-часовен надзор.
Со тоа, во странските медицински центри се третираат 80 повредени, од кои двајца се третираат амбулантски, а нема промена во нивната состојба во однос на минатите денови.
Во изминатото деноноќие на Клиниката за пластична хирургија е примен пациент кој е вратен од Грција и по неопходните испитувања ќе биде пуштен на домашно лекување.
Во моментов на оваа Клиника се хоспитализирани тројца повредени.
Во изминатото деноноќие нема згрижени повредени на Клиниката за токсикологија.
Во ГОБ 8 Септември се хоспитализирани тројца, а во Хируршката клиника Свети Наум остануваат шест, кои се хоспитализирани на одделение.
На Клиниката за пулмологија се хоспитализирани двајца повредени, додека во приватните установи останува непроменета состојбата со бројот на хоспитализирани.
Пристигнати се и тимови од странство со големо искуство во областа на рехабилитација на пациенти со изгореници кои во моментов прават евалуација на просторните услови и апаратурата во неколку центри за рехабилитација на пациенти со изгореници.
Фото: МЗ