По изјавата на премиерот Христијан Мицкоски дека Македонија ќе почека Бугарија да избере редовна влада по изборите во октомври, за да продолжи дијалогот помеѓу двете земји, со реакција се јавија од бугарското Министерство за надворешни работи (МНР).
Од таму велат дека и со службена (техничка) и со редовна влада нема да има репреговарање на договореното со Македонија и посочуваат дека службената влада на Бугарија е легитимна влада која ги има сите прерогативи за управување со земјата.
„Изјавата на премиерот на Република Северна Македонија, за жал, уште еднаш отворено ја доведува во прашање европската перспектива на неговата земја. На властите во Скопје треба да им биде јасно дека обидите за покренување идеи за повторно преговарање на веќе преземените меѓународни обврски може да доведат само до дополнително оддалечување од почетокот на преговорите за членство во ЕУ.
Овој наш став нема да се смени без разлика дали ќе управува службена или редовна влада. Потсетуваме дека како резултат на непотребните провокации и конфронтации со соседните земји, Северна Македонија веќе изгуби премногу време во процесот на отворање на пристапните преговори“, велат од таму.
Од бугарското МНР потсетуваат дека летото 2022 година бил постигнат консензус меѓу 27. земји членки на ЕУ и Македонија, во кој, како што велат од таму, целосно се опишани сите чекори за постигнување вистински напредок во процесот на европската интеграција на земјава.
„Бугарската позиција е јасно наведена и во Одлуката на Народното собрание од 24. јуни 2022 година, поддржана од сите политички сили. Таа е израз на волјата на бугарските граѓани да ја поддржат Северна Македонија во процесот на исполнување на критериумите за членство во ЕУ, под услов соседната земја да се придржува до највисоките стандарди во областа на човековите права и да ги исполни преземените меѓународни обврски.
Оваа позиција на национално ниво нема да се промени“, велат од таму.
Фото: бугарско МНР