Опозициската ВМРО-ДПМНЕ во техничката влада, која треба да се изгласа до полноќ во недела ќе има и тројца дополнителни заменици-министри.
ПОВРЗАНИ ВЕСТИ
Кои се кандидатите на ВМРО-ДПМНЕ за министри и заменици-министри во техничката влада
За дополнителен заменик министер за финансии, партијата ја предложи Елена Петрова, дипломиран економист со над 25 годишно работно искуство во Управата за јавни приходи (УЈП).
Според нејзината биографија, Петрова седум години била управник во Дирекцијата за јавни приходи – за големи даночни обврзници, а претходно била раководител на даночното Одделение во Свети Николе, раководител на Одделот во секторот за оперативна политика и едукација, како и раководител во Секторот за утврдување и наплата на даноци во Генералната дирекција.
Таа има и осум години работно искуство во приватниот сектор, а во моментот е заменик претседател на Работното тело за имплементација на Даночен информациски систем во УЈП, а членувала и во неколку управни одбори на проекти со Министерството за финансии, Министерството за труд и социјална политика, УЈП, Фондот за пензиско за пензиско и инвалидско осигурување, Фондот за здравствено осигурување и Агенцијата за вработување.
Земјоделскиот инжинер Цветан Трипуновски е предлог за дополнителен заменик министер за земјоделство, шумарство и водостопанство.
Тој и во претходната техничка влада беше на позицијата дополнителен заменик министер.
До сега има работено во Министерство за земјоделство, шумарство и водостопанство како државен советник, а претходно од 2015 до 2017 година ја извршувал и функцијата директор на Државниот земјоделски инспекторат, а во периодот од 2006 до 2008 година беше прв човек на државната фитосанитарна лабораторија.
Трипуновски од 2008 година до 2012 година беше пратеник од редовите на ВМРО-ДПМНЕ.
Трипуновски во 2017 година бил член на Извршниот комитет на ВМРО-ДПМНЕ, а во моментот е претседател на Комисијата за земјоделство на партијата.
За нов дополнителен заменик министер за информатичко општество и администрација е предложен Стефан Андоновски, меѓународен секретар на партијата и советник во Советот на Град Скопје.
Андоновски е докторанд на Правниот факултет “Јустинијан Први” во Скопје и магистер по меѓународни односи на Универзитетот Џонс Хопкинс во САД.
Пред да влезе во политика, пет години работел во приватниот сектор и бил консултант на меѓународни донаторски проекти во областа на дигиталниот маркетинг, комуникации и медиуми.
ПОВРЗАНИ ВЕСТИ
Кој е Панче Тошковски, кандидатот на ВМРО-ДПМНЕ за министер за внатрешни работи во техничката влада
Фото: Фејсбук/Трипуновски/Андоновски/Петрова