На 8. март околу 19 часот на подрачјето на Бит Пазар во Скопје, пет лица се обиделе да убијат 33-годишен маж, информираа денеска од Министерството за внатрешни работи (МВР).
Нападнатиот е со тешки телесни повреди, а напаѓачите биле приведени. Од нив двајца завршиле во притвор во затвор, а двајца во домашен притвор.
-Единицата за насилен криминал-Одделението за крвни и сексуални деликти при СВР Скопје до надлежното ОЈО Скопје поднесе кривична пријава за обид за убиство против пет лица во врска со кривично правен настан на 08.03.2024 околу 19 часот на подрачјето на Бит Пазар во Скопје, кога пет лица со остар и тврд предмет го нападнале М.А. (33) од Скопје и му нанеле тешки телесни повреди.
Веднаш по добиената пријава, преземени се соодветни мерки и активности од страна на полициски службеници од Единицата за насилен криминал при СВР Скопје и С.Е. (30), И.Е. (27), Х.Е. (48), Б.Е.(23), сите од Скопје, се лишени од слобода, а денеска и Ј.Б. (20) од Скопје е лишен од слобода.
Во координација со ОЈО Скопје од страна на ЕНК-ОКСД при СВР Скопје поднесена е кривична пријава по член 123 во врска со член 19 од КЗ, а од страна на судија на претходна постапка на лицата С.Е. и Х.Е. им е определена мерка притвор во времетраење од 30 дена, додека пак на лицата И.Е. и Б.Е. определена им е мерка домашен притвор, информираа од МВР.