Почитувањето и спроведувањето на одлуките на Европскиот суд за човекови права (ЕСЧП) во Стразбур не се билатерални прашања, туку задолжителна обврска на секоја земја членка на Советот на Европа, реагираа од македонското Министерство за надворешни работи и надворешна трговија (МНР), откако бугарското МНР, спроведувањето на истите си го протумачи како мешање во нејзините внатрешни работи.
ПОВРЗАНИ ВЕСТИ
За Бугарија не било мешање во внатрешните работи на Македонија промената на македонскиот Устав.
„Република Северна Македонија останува целосно посветена на владеењето на правото и почитувањето на човековите права и слободи како темелни вредности на европската интеграција и не може да прифати нивно негирање или релативизирање, вклучително и кога станува збор за правата на припадниците на македонското малцинство во Република Бугарија“, велат од македонското МНР и нагласуваат дека земјава е максимално посветена на процесот на европска интеграција, процес кој, како што наведуваат, не треба да биде злоупотребен со воведување на дополнителни политички услови кои не се дел од Копенхашките критериуми.
Во оваа смисла, од таму посочуваат дека политиката на условувања и неосновани обвинувања е непринципиелна пречка на евроинтегративниот пат на земјава и наместо градење добрососедски односи, создава непотребни тензии.
„Во оваа прилика силно се залагаме за развивање на пријателските односи меѓу двете држави и за решавање на сите отворени прашања преку рамноправен дијалог, одговорно однесување, заемна почит и разбирање.
Очекуваме еднакво конструктивен пристап и од страна на Бугарија, заснован на целосно почитување на целите и принципите на Повелбата на ОН и правилата на меѓународното право, затоа што тоа е во интерес на нашите граѓани, во интерес на двете земји и во прилог на зацврстување на регионалниот мир, стабилност, безбедност и заедничката европска перспектива“, велат од македонското МНР.
ПОВРЗАНИ ВЕСТИ