360 степени објави дека новата министерка за енергетика, рударство и минерални суровини од ВМРО-ДПМНЕ, Сања Божиновска, освен македонско и чешко, има и бугарско државјанство.
Како што стои во нејзината биографија која неодамна ја објави и еМагазин, таа меѓудругото работела и во групацијата „Руднап“ со седиште во Белград, Србија.
ПОВРЗАНИ ВЕСТИ
Која е Сања Божиновска, кандидат за министер за енергетика
Од 360 степени го провериле историјатот на филијалата на „Руднап“ во Загреб, кој е бесплатен и јавно достапен запис и на неколку места го сретнале името на Божиновска.
-На ден 6.12.2013 година, кога се правени измени во структурата на компанијата, освен што ѝ е споменато името Sanya Bozhinovska, пишува и дека лицето има матичен број (личен идентификациски број): 38563731070 и број на пасош 382526102, но не на Република Македонија, туку на Република Бугарија. И дека живее на адреса во Белград.
Или, Сања Божиновска, која, според биографијата, тогаш работела за компанијата „Руднап“, во Хрватска била пријавена и се идентификувала со бугарски пасош. А за бугарски пасош, прво е потребно да се обезбеди бугарско државјанство. За некој, пак, да добие бугарско државјанство, треба да се декларира дека се чувствува како Бугарин пред тамошните власти, пишува 360 степени.
Од порталот и се обратиле на Божиновска. На прашањето дали поседувала или дали во моментов поседува бугарско државјанство и зошто не го декларирала во биографијата приложена кон предлогот за состав на новата влада, таа одговорила:
„Што се однесува до вашите конкретни прашања, во мојата официјална биографија е јасно наведено дека сум македонска државјанка и дека поседувам и чешко државјанство. Во врска со тврдењата за бугарско државјанство, сакам да нагласам дека не поседувам бугарско државјанство и сите релевантни информации се транспарентно наведени во мојата биографија“.
-Што се однесува до бугарското државјанство, министерката Сања Божиновска на ниту едно место во одговорот не кажува дали во минатото го поседувала иако и тоа е дел од прашањето, велат од порталот.
360 степени направил дополнителни проверки кои покажале дека Божиновска побарала отпуст од бугарско државјанство во втората половина на минатата година и дека процедурата сè уште не е завршена.
-Преведено, тоа значи дека Божиновска сè уште е државјанка на Република Бугарија, пишува 360 степени.
Информација дека има чешко државјанство во нејзината биографија доставена до Собранието пред нејзиниот избор за министерка нема.
Фото: Божиновска/Фејсбук