Љупчо Тодоровски-Радникот, поранашен прв човек на Бирото за јавна безбедност (БЈБ) денеса сведочеше на судењето за случајот „Монструм“ за убиството на пет лица кај Смилковското езеро.
Тодоровски негираше дека тој или БЈБ знаеле дека ќе се случи масакрот кај езерото и како шпекулации ги отфрли информациите од т.н. „бомби“ дека извесен Зоран Трајковски-Филмот требало да му даде информации за овој случај. Тој рече дека го знаел Трајковски, но дека немал ниту средба, ниту контакт со него за овој случај.
Хаки Азири, кој требаше да биде заштитен сведок за случајот, но потоа се предомисли и стана обвинет, остана на тврдењето дека Радникот му дал да потпише подготвена изјава со која признава учество во убиството.
Тодоровски рече дека не бил во судот кога бил испрашуван Азири, ниту пак дека го малтретирал.
Азири потоа за медиумите изјави дека никогаш не изјавил дека Радникот го малтретирал, но дека останува на тврдењето дека тој е човекот кој му дал да потпише подготвена изјава.
На рочиштето за Монструм денеска сведочеше и поранешната министерка за внатрешни работи, Гордана Јанкулоска, а на следното рочиште како сведоци треба да се појават Али Ахмети и Бујар Османи.
ПОВРЗАНИ ВЕСТИ
Фото:Youtube/MVR