Јавното комунално претријатие „Тетово“ воведува рестрикции во водоснабдувањето поради драстично намалување на дотокот на количини на вода откако се појави дефект на главниот цевковод од новиот систем.
Вчера беше утврдено дека е скината пластична цевка од цевководот кој носи вода од месноста Лешница преку новиот систем за снабдување до градската водоводна мрежа. Оваа рестрикција ќе биде трае се до санирање на дефектот на водоводната линија од Лешница.
Здружението „Еко Герила“ побара да се испита како се изградил новиот водоснабдителен систем за Тетово поради честите дефекти и прекини во снабдувањето. Според нив, независна комисија треба да утврди дали системот е направен согласно сите стандарди.
„Честите дефекти во новоизградената мрежа во Лешница оставаат сериозни сомневања за квалитетот на градбата, при што многу граѓани ја имаат изгубено довербата во сериозноста на работите кои ги реализира или нарачува Општина Тетово.
Истражна комисија од независни експерти треба да го испита нивото на изградбата на оваа мрежа и дали таа ги исполнува потребните стандарди и параметри за нормално функционирање и редовно снабдување со вода за пиење на градот Тетово“, се вели во соопштението од „Еко Герила“.
МИА