Американската амбасадорка Анџела Агелер го критикува изборот на новиот шеф на Основното јавно обвинителство за гонење организиран криминал и корупција (ОЈО ГОКК), Ислам Абази.
На прашања на „360 степени“ да даде став за целиот процес, таа изразува отворено незадоволство од начинот на кој Абази стана шеф на Обвинителството што треба да ја предводи борбата против корупцијата.
Амбасадорката и Амбасадата, се вели во писмениот одговор до „360 степени“, очекувале повеќе и поради милионите долари потрошени во обуки на обвинителите кои, пак, самите гласаа за шеф на ОЈО ГОКК. Се додава и дека граѓаните заслужуваат независен правосуден сектор и дека политичкото мешање нема место во овие постапки.
-Ние, во Амбасадата на САД, секако дека резултатите ги сметаме за збунувачки, особено откако во изминатите години потрошивме милиони долари на обука на обвинители и други во правосудниот систем.
Граѓаните на С Македонија заслужуваат независен правосуден сектор во кој позициите се пополнуваат по заслуга и квалитет (по мерит), низ транспарентни процеси, без разлика дали се во обвинителство, судство или која било друга јавна институција. Политичкото мешање нема место во овие постапки.
Оние што би се вмешале преку вршење притисок, закани или коруптивни зделки на ‘мала врата’ треба да бидат повикани на одговорност од граѓаните“, вели амбасадорката Агелер.
На истото прашање на редакцијата до холандската Амбасада во земјава, се вели дека „за Холандија, владеењето на правото е од огромно значење и внимателно ги следиме сите случувања во правосудниот сектор во С Македонија“.
-Во февруари 2020 година, во последен момент, пред парламентот да се самораспушти на подолг период, со закон овозможи гонење на случаите на корупција на високо ниво што беа под СЈО.
Овој поединечен настан ѝ овозможи на Холандија да се согласи да започне процедура за пристапување во ЕУ за С Македонија во март 2020 година. Затоа, работата на Основното обвинителство за гонење организиран криминал и корупција и како тоа постапува со сите случаи на организиран криминал и корупција на високо ниво ќе продолжи да биде под лупа од Холандија“, велат од Амбасадата на Кралството Холандија за „360 степени“.
Од Делегацијата на ЕУ во земјава, пак, на истото прашање нагласуваат дека „очекуваат новиот шеф на ОЈО ГОКК да работи посветено и во дух на независност и дека борбата против корупцијата ќе биде под детален надзор на ЕУ“.
ПОВРЗАНИ ВЕСТИ
Абази случајно го сретнал Бејта на планина, а фотографијата со братот на Ахмети била од свадба
Обвинителот Ислам Абази непознат за јавноста, ама добро познат во ДУИ
Фото: Амбасада на САД/Фејсбук