Доколку во текот на летово ја проверувате апликацијата “Мојот воздух“, ќе приметивте дека во Скопје нема загадување над дозволеното и покрај тоа што големите компании од индустријата, кои секоја зима се ставаат на тапет и се посочуваат како загадувачи, работат турбо.
Овој факт ги потврдува бројните истражувања кои покажаа дека најголеми загадувачи се домаќинствата, не само во Скопје, од кои дури над 60% користат дрва за затоплување, но и превозните средства, како автомобилите, од кои голем процент немаат катализатори за издувни гасови и испуштаат високоштетни материи.
Загадувањето во Скопје сега не е тема, но ќе стане за неколку месеци, а овој период е вистинското време надлежните да најдат начин како да ги направат финансиски достапни другите начини за затоплување, кои нема да загадуваат.
Да не заборавиме и дека во групата на најголеми загадувачи се и бројни институции и јавни објекти кои се греат на мазут и екстра лесно масло за домаќинство.
ПОВРЗАНИ ВЕСТИ
Минатата зима од советничка листа во скопската општина Центар, „Шанса за Центар“ пресметаа дека станува збор за најмалку 100 такви објекти!
Потребно е време, работа со граѓаните и секако да им се понудат прифатливи алтернативи за греењето со дрва или масло за греење, но за да се промени начинот на греење кај државните институции е потребна пред се политичка волја и сериозни инвестиции во енергенси кои не загадуваат.
Покрај другите мерки, треба да се продолжи и со проширувањето на мрежата за парно греење на која треба да се приклучат сите јавни институции кои имаат пристап до неа.