Се менува кривичното дело за случајот „Трезор“, кое го отвори поранешното Специјално јавно обвинителство (СЈО), со што обвинетите ќе добијат поблаги казни.
Во овој случај, кој се однесува на злоупотреба на средства од Буџетот на државата за набавка на електронско-комуникациска опрема за потребите на Петтата управа при Управата за безбедност и контраразузнавање (УБК) и обука за нејзино користење од фирма од Велика Британија, првообвинет е поранешниот директор на УБК, Сашо Мијалков, поранешниот шеф на неговиот кабинет, Тони Јакимовски, поранешниот помошник-министер во МВР, Небојша Стајковиќ и поранешениот началник на Петтата управа во МВР, Горан Грујевски.
Како што денеска информира од Кривичен суд, јавниот обвинител извршил прецизирање на обвинителниот акт и преквалификација на кривичното дело согласно измените на Казнениот законик (КЗ) за еден од обвинетите, додека одбраната барала тоа да се примени и за останатите.
– Во Основниот кривичен суд Скопје денеска се одржа главната расправа за предметот со КОК бр. 214/22 од обвинителството означен како „Трезор“ на која јавниот обвинител, имајќи ги предвид измените и дополнувањата на Кривичниот законик изврши прецизирање на обвинителниот акт, како и преквалификација на кривичното дело од член 353 ст. 5 во став. 4, а во врска и со други членови, па врз основа на тоа побара за обвинетиот Н.С. да се примени поблагиот Закон и судот да донесе соодветна одлука во правец на измените во КЗ.
Одбраната пак побара од судот поблагиот Закон да се примени и за останатите обвинети, без разлика на прецизирањето на акт, за што судот ја одложи расправата за 24.11.2023 година во 09:00 часот за кога побара и јавниот обвинител дополнително да се произнесе за предлогот на одбраната, информираа од Кривичен суд.
ПОВРЗАНИ ВЕСТИ
Мијалков на повтореното судење за „Трезор” се изјасни за невин