Дете на 15 години било запрено од полицијата во вечерните часови на 23. јануари, додека возело во скопско Волково, а во автомобилот биле пронајдени дури пет пиштоли.
Во автомобил Ауди А8 се пронајдени два пиштоли, едниот со калибар 7,65мм, а другиот со калибар 9мм со по четири куршуми за секој од нив, еден пиштол за кој неговиот татко имал дозвола за поседување со осум куршуми, и уште два сигнални пиштоли.
Основното јавно обвинителство отвори истражна постапка за 55-годишниот татко на момчето, кој се товари за Неовластено изработување, држење, посредување и тргување со оружје и експлозивни материи.
Исто така, како што информираат од таму, јавен обвинител до судијата на претходна постапка од Основниот кривичен суд Скопје доставил предлог за определување мерки на претпазливост за таткото – забрана за напуштање на живеалиштето односно престојувалиштето, обврска повремено да се јавува кај определено службено лице, одземање на патната исправа, одземање на возачката дозвола, но и забрана за неговиот малолетен син, други малолетни лица или други неовластени лица да имаат пристап во просторија или во домот каде што има огнено оружје.