Владата ја дополни Алатката за отчетност која е достапна на веб-страницата, vlada.mk.
Од денеска на јавноста и се достапни личните службени трошоци на носителите на јавни функции за периодите: декември 2017 – мај 2018 и декември 2014 – мај 2015 година, со можност за споредби меѓу различните функционери, институции и периоди.
Според достапните податоци во алатката, за над 65 проценти се намалени службените трошоци на актуелната Влада во вторите шест месеци од нејзиното работење, во однос на првите шест месеци.
„Дополнително, споредено со претходната, оваа Влада реализирала три пати помалку пари на граѓаните за лични службени трошоци за периодот декември 2017 – мај 2018 или поточно 15.081.921 денари, во однос на 48.504.457 денари потрошени од претходната влада, за период декември 2014 – мај 2015 година.
За првите 12 месеци од работата на оваа Влада според податоците во Алатката јавните функционери потрошиле 37 милиони денари, во споредба со 94 милиони денари на претходната влада, односно два и пол пати помалку“, се вели во соопштението од Влада.
Заштеди има во сите типови трошоци, а посебно во угостителските услуги каде има скоро двојно помалку трошоци односно 6.352.591 денари, во споредба со 11.000.030 денари за периодот јуни – ноември 2017 година.
„За споредба, вкупниот износ на угостителските услуги на компаративниот период декември 2014 – мај 2015 година на претходната Влада е речиси четири пати поголем и изнесува 22.335.614 денари“, се додава во соопштението.
Алатката за отчетност на Владата беше промовирана во месец март оваа година.