На Универзитетската клиника за државна кардиохирургија на пациентот Мухарем Реџепи (54), татко на шест деца, му е вградено вештачко срце.
Во овој случај, кај пациент со тешка срцева слабост, е ставен уред кој е еден тип на механичко срце вграден во левата комора. Тоа ја всисува крвта од левата комора и преку една протеза ја носи во аортата. Мала е, бесшумна, трајна е и се наоѓа внатре, а од надвор е само батеријата која ќе се менува за таа да работи.
Операцијата, која траела два ипол часа, ја извел тимот на Универзитетската клиника за државна кардиохирургија. Тимот доктори се задоволни од операцијата, а пациентот е во добра состојба.
– Ваквите операции, на пример во Германија чинат 340-350 илјади евра, а севкупните трошоци овде не поминуваат повеќе од 120.000 евра. Ова претставува унапредување на севкупниот здравствен систем во Република Македонија, изјави премиерот Зоран Заев кој со министерот за здравство Венко Филипче го посетија пациентот.
Филипче изјави дека ова е уште една нова метода што се имплементира во нашето јавно здравство.
– Ова е еден модел на едукација на нашите лекари од страна на странски лекари што ни дава одлични резултати во смисла и на заштеда, но и сериозно надградување на знаењето на нашите експерти, рече Филипче.
Со овој уред се живее нормален и квалитет живот, кој се продолжува за 10-15 години.
Фото: Фејсбук/Венко Филипче