Во изминатава недела од 17 до 23 октомври во Македонија починаа 62 лица од Ковид-19, покажуваат податоците што секојдневно ги објавува Министерството за здравство.
Меѓу починатите имаше и пациенти на возраст од 30 до 50 години.
Загрижува што во повеќе наврати бројката на регистрирани позитивни случаи надминува 500 лица дневно.
Министерот за здравство Венко Филипче вчера соопшти дека силниот есенски бран ги оптерети лабораториите за тестирање и дека работи на изнаоѓање решение за нови термини.
„Викендов сите лаборатории ќе работат со полн капацитет за да се постигне со обработката на тестови, а денеска разговаравме за отворање на нови термини на почетокот на следната недела. Сите капацитети се максимално ангажирани, колегите работат во три смени. Верувам дека брзо ќе изнајдеме решение за надминување на состојбата“, потенцира Филипче.
Очигледно е дека сосотјбата со Ковид-19 повторно станува алармантна и дека бројката на заболени најверојатно е многу поголема отколку регистритраните случаи.
Останува да се види дали и Македонија по примерот на Словенија, Франција и други европски земји повторно ќе воведе нови рестрикции и полициски час за да се спречи ширењето на заразата.
Фото: МЗ