Во свечениот амбиент на „Понтификалниот институт за ориентални студии“ во Рим, се одржа проекцијата на документарниот филмот „1000 години – Сведок на Светлината“, посветен на илјадагодишнината на Бигорскиот манастир, во авторство и режија на Илија Ико Каров.
На иницијатива на македонската амбасадорка во Ватикан, Марија Ефремова, а под покровителство на Директорот на Комисијата за односи со верските заедници и религиозни групи, Даријан Сотировски, документарецот за Бигорскиот манастир беше проектиран пред голем број амбасадори и други дипломати од повеќе држави, акредитирани во Светата Столица.
Целта на оваа проекција беше запознавање на дипломатскиот кор од повеќе држави во Ватикан со македонското културно и духовно богатство.
На настанот се обратија амбасадорката Ефремова, која ја отвори свеченоста, ректорот на Понтификалниот ориентален институт отец Давид Назар, директорот на Комисијата за односи со верските заедници и религиозни групи Даријан Сотировски, јеромонахот Кирил од Бигорскиот манастир и режисерот на филмот Илија Ико Каров.
„Денес имаме ретка прилика, поради која сме радосни, но и возбудени пред сите Вас да го презентираме еден од нашите најзначајни дијаманти, македонскиот православен манастир Св. Јован Крстител – Бигорски, кој е наше вредно културно и духовно наследство, но и современа реалност која плени по својот дух, дух кој илјада години го чува силен огнот на преданието на Црквата.
Колку ли работи се променија во последниве 1000 години? Колку ли работи можеа да значат крај за ова наше светилиште? Колку среќна е денешната генерација која и покрај сé, е современик на илјадагодишен манастир кој е пожив од било кога?,“ истакна во својот говор директорот на КОВЗРГ, Сотировски.
Јеромонахот Кирил од Бигорскиот манастир истакна дека е огромна честа филмот са се промовира во Вечниот град, кој е сведок на безброј епохални настани.
„Навистина е чест и привилегија што имам можност да се обратам пред овој свечен и уважен аудиториум, кој вечерва има својство на еден непогрешлив arbiter elegantiarum. Честа и срдечниот трепет во мене се дотолку поголеми, што ова наше достоинствено собрание се одвива овде, во Вечниот Град, in Urbe Aeterna, кој е сведок на безброј епохални настани, татковина на недобројни славни историски личности, град-музеј на еден цивилизациски континуум што трае ab Urbe condita, од 753 година пред Христа, па сè до денес.
Сето ова, на вечерашниов наш настан му дава несомнено еден силен тон на мистично великолепие. Во средето на оваа цивилизациска лулка ќе биде емитуван документарниот филм за еден, исто така, исклучително долг, милениумски духовен и културен континуитет. 1000 години – Сведок на Светлината.
Се чини дека самиот наслов е доволно моќен, за да ја пренесе сериозноста и свештеноста на, со десет века напластуваната содржина на духовност, убавина, просветление, возвишеност, светост,“ истакна јеромонахот Кирил.
Не можеше да се сокрие големото воодушевување што содржината и естетиката на филмот го предизвика кај присутните гости, кои со громогласен аплауз им оддадоа искрено признание на режисерот Илија Ико Каров, на првиот асистент на режија и монтажер Бранко Блажевски, кој беше меѓу присутните, како и на целата екипа којашто цели пет години заедно со нив работеше на овој проект.
„Сонцето секое утро се буди и изгрева на Истокот, потоа сонливо, растејќи се издигнува на највисоката точка на небото; во својот зенит од каде што грее најсилно за сите. Потоа спокојно и полека го продолжува својот пат, упатувајќи се кон прегратките на Западот, каде што мирно ќе заспие и ќе зајде; ќе отпочине до утре.
Бог така совршено ја усторил Светлината, што таа не може да биде целосна ниту без Истокот, ниту без Западот…“ – подвлече во својот говор, авторот и режисер на филмот, Каров, правејќи, меѓу другото, алузија и со животот на Свети Константин – Кирил Философ и на тој начин потенцирајќи ја врската на македонската земја со Вечниот Град.
Извор/фото: bigorski.org.mk