Претседателот на Алтернатива, Африм Гаши вчера во Струмица имал средба со поранешниот лидер на СДСМ, Зоран Заев.
Информацијата на Фејсбук ја потврди Гаши, откако претходно неговиот поранешен сопартиец, Скендер Реџепи-Зејд, кој сега е независен пратеник, откако ја напушти Алтернатива, информираше за тоа објавувајќи и фотографија од средбата, прашувајќи: „прашање за 1 милион евра – што побара денес Африм Гаши од Зоран Заев и зошто мораше да оди дури до Струмица?“.
Гаши пак на Фејсбук напиша дека вистинското прашање e зошто и по чиј налог го следат службите на СДСМ и на ДУИ.
„Како лидер на Алтернатива, имам мандат и должност да се среќавам со сите политички актери во земјата. Така сум работел досега и така ќе работам и во иднина.
Следствено, нема ништо посебно и мистериозно во мојата средба со поранешниот премиер Зоран Заев.
Јас го разбирам интересот на медиумите за оваа средба, но мислам дека вистинското прашање не е кој, каде и зашто се среќавам, туку зошто, по чиј налог и од каков страв ме следат службите СДСМ-ДУИ?“, напиша Гаши.
Фото: Влада/Фејсбук/Реџепи